Акаѳистъ Свят. Гликерiю Исповѣднику [15 VI]

Print Friendly, PDF & Email

Nicefor.Info




егоже память 15/28 иуния

ТРОПАР НА СВ. ГЛИКЕРИЙ, ГЛАС 4.

Веры истинныя исповедниче, архипастырю добрый Христовы Церкве, верным светильниче, преблаженне святителю Гликерие, сподобивыйся вечнаго живота венчания, моли Христа Бога, спастися душам нашым.

КОНДАК НА СВ. ГЛИКЕРИЙ, ГЛАС 8.

Иерарше преизряднейший Церкве Христовы, Правыя Веры поборниче, покрый вся правоверныя люди, поющыя ти присно: Радуйся, святителю Христов Гликерие, дивен исповедниче Господень.

* * *

КОНДАК 1.

Поборниче Правыя Веры, житием и ученьми твоими украсил еси Церковь Христову, преблаженне святителю Гликерие; темже верою и благоговением восхваляем тя, почитающе труды твоя и глаголюще: Радуйся, преблаженне святителю Гликерие, Православия исповедниче!

ИКОС 1.

От младенства избран быв от Бога пасти овцы Его словесныя на пажити Правыя Веры, святителю Гликерие, без страха проповедал еси пасомым твоим чистое Православие, и возвратил еси к Вере заблуждшыя, сего ради хвалим тя, глаголюще сице:
Радуйся, яко издетска Веру Правую хранил еси;
радуйся, яко за Православие многия труды подъял еси.
Радуйся, яко во крещении имя святаго Георгия приял еси;
радуйся, яко житию его последовал еси.
Радуйся, яко за Веру Правую мученик показался еси;
радуйся, яко за Православие до смерти болезни терпел еси.
Радуйся, яко за правоверие на смерть осужден был еси;
радуйся, яко чудом Божиим от смерти избавлен был еси.
Радуйся, яко молитвою от смерти спаслся еси;
радуйся, яко Бог на пользу Церкви Своея соблюде тя.
Радуйся, яко верующыя водою правоверия напаял еси;
радуйся, яко овцы стада твоего от зловерия папскаго защищал еси.
Радуйся, преблаженне святителю Гликерие, Православия исповедниче!

КОНДАК 2.

Лучу света подобне, возсиял еси от родителей благоверных, святителю Гликерие, и словесы божественными Церковь Христа Бога украсил еси, ныне же на небесех в Церкви торжествующей безпрестани Богу поеши: аллилуия!

ИКОС 2.

От святаго крещения вено Веры истинныя приял еси, святителю Гликерие, и во время благоприятно Бог воздвиже тя да очистиши Церковь Его от плевел папскаго зловерия. Сего ради тя хвалим пением сицевым:
Радуйся, от родителей благоверных прозябший;
радуйся, Верою истинною украсивыйся.
Радуйся, яко праотцы твои за Веру страдаша;
радуйся, яко меру страданий их ты восполнил еси.
Радуйся, яко за Веру праотеческую пострадал еси;
радуйся, яко нововведения папская посрамил еси.
Радуйся, яко истинную Веру терпением и страданьми явил еси;
радуйся, яко из Сучавы в Яш прешел еси.
Радуйся, яко в монастырь Четацуия водворился еси;
радуйся, яко житию монашескому тамо научился еси.
Радуйся, ум свой божественными поучении просветивый;
радуйся, огнем любве Божия питавыйся.
Радуйся, преблаженне святителю Гликерие, Православия исповедниче!

КОНДАК 3.

Житию монашескому совершенне обучився, на степень диаконства и священства возведен был еси, преблаженне Гликерие, служа лето едино при святыя мощи преподобныя Параскевы, и всего себе Богу предав, пел еси Ему: аллилуия!

ИКОС 3.

Жаждя житие изряднее, во святую обитель Нямецкую вселился еси, идеже образ святаго жития всем был еси, чреду священническую совершая и во всех верен показуяся, святителю Гликерие. Сего ради благоговением тя хвалим и глаголем:
Радуйся, вся монахи обители Четацуйския житию святому научавый;
радуйся, в митрополии Молдовстей священник бывый.
Радуйся, преподобней Параскеве верно послуживый;
радуйся, страху Божию вся научивый.
Радуйся, образ святаго жития всем показавый;
радуйся, Христа в сердце своем носивый.
Радуйся, Бога смирением и верою умолявый;
радуйся, словом и делом Христа исповедавый.
Радуйся, яко многия в Вере Правей наставил еси;
радуйся, яко в посте и молитве вся дни живота твоего пожил еси.
Радуйся, яко во искушениих и страданиих яко адамант просиял еси;
радуйся, бисере Веры, от врагов неодоленне.
Радуйся, преблаженне святителю Гликерие, Православия исповедниче!

КОНДАК 4.

Во дни, егда злобою нападоша новостильницы на благоверныя христианы православныя, сыны истинныя Церкве нашея возрадовашася несказанно о избрании твоем в пастыря их, святителю Гликерие, и зряще тя поборника крепка праотеческия веры их, воспеша Богу песнь: аллилуия!

ИКОС 4.

Сияя яко звезда Православия, призва тя Спаситель Христос ко священству, в немже достойно послужил еси Ему душу свою полагая за Правую Веру; темже Господ Иисус возвыси тя на престол архиерейский, освящену ти бывшу митрополитом Галактионом. Сего ради, радуяся снисхождению Божию, хвалим тя песньми таковыми:
Радуйся, яко священническое служение твое свято исполнил еси;
радуйся, яко Господу служа со страхом, к высшей степени воззвася.
Радуйся, яко Господь честию святительства одея тя;
радуйся, яко иерарх достоин Христос яви тя.
Радуйся, яко митрополит изряден всем православным показася;
радуйся, яко всеми добродетельми святительскими украшен бе.
Радуйся, яко митрополия благоверных тебе вверися, еже паствити ю;
радуйся, яко народа пособие имея, монастырь Слатиоара основал еси.
Радуйся, яко чада твоя страху Божию научил еси;
радуйся, яко постом и молитвою вся враги твоя посрамил еси.
Радуйся, яко всем усерден помощник был еси;
радуйся, яко к нищым всегда милостив был еси.
Радуйся, преблаженне святителю Гликерие, Православия исповедниче!

КОНДАК 5.

Жития твоего святаго слух пронесе ся, святителю Гликерие, даже до земель чуждых, и вси, слышаще тако, прославиша Бога поюще Ему: аллилуия!

ИКОС 5.

Возсел еси на престоле митрополии всех благоверных страны Ромынския, яко свеща многосветлая на свещнице Церкве Христовы, озаряя вся ученьми своими правыми Веры праотеческия. Темже и мы со умилением прославляем тя сице:
Радуйся, яко Христос вручи ти престол митрополии, иже в Слатиоаре;
радуйся, яко молнию всю землю Ромынскую облиставый.
Радуйся, яко пастырь изряден Христову стаду был еси;
радуйся, яко от рук папистов овцы словесныя сохранял еси.
Радуйся, яко лукавствию новостильников одолел еси;
радуйся, яко прещения их никакоже тебе устрашиша.
Радуйся, оружием бо Истины вооружен был еси;
радуйся, ибо от попов лживых мужески напасти претерпел еси.
Радуйся, яко вкупе со отцем Давидом супостаты победил еси;
радуйся, яко священоисповеднику Ефесскому Марку уподобился еси.
Радуйся, яко Истины ради оковы железными связаша тя;
радуйся, яко и в том святым Апостолом последовал еси.
Радуйся, преблаженне святителю Гликерие, Православия исповедниче!

КОНДАК 6.

Проповедуя велиею ревностию и дерзновением слово Бога истиннаго, отче наш Гликерие, верныя овцы твоя защитил еси от козней злых гонителей, укрепляя паство твое в претерпении доблем, Христа ради, от Негоже всяка победа. Сего ради поем о тебе вси Богу: аллилуия!

ИКОС 6.

Освященну ти бывшу во архиерея по святым правилам в Моаре Домнестей, иже в Букурещи, внегда возвращался еси в Молдову, в обитель Слатиоарскую, радостию велиею зело прияша тя священницы и народ благоверный; ты же всех утешал еси о Вере истинней; темже и мы тя чтим и глаголем сице:
Радуйся, ревностию Божественною исполнь, к своим возвративыйся;
радуйся, блаженне святителю Христа Бога нашего.
Радуйся, егоже чада духовная любовию чаяху;
радуйся, от негоже вся чада твоя благословение архипастыря прияша.
Радуйся, яко из темницы изшед и заточение скончав, в Слатиоару возвратился еси;
радуйся, яко паки радощами отец Давид прият тя.
Радуйся, яко Бог во всех бедах укрепляше тя;
радуйся, яко вся в Вере правей наставил еси.
Радуйся, яко прельстившымся крепким дерзновением противился еси;
радуйся, яко льщения и дары их не соблазниша тя.
Радуйся, яко и прещения их не устрашиша тя;
радуйся, яко оплевания и безчестие от них добле претерпе.
Радуйся, преблаженне святителю Гликерие, Православия исповедниче!

КОНДАК 7.

Прежде рукоположения твоего во архиерея, в день святаго Григория Неокесарийскаго, от веси Ракитуасы, идеже заточен был еси, нощию пояша тя и в Букурещь тайно приведоша, страха ради новопапистка, святителю Гликерие; таже освящен быв, крест Христов понесл еси, верою поя Богу: аллилуия!

ИКОС 7.

Христос Спас наш, призирая на тайныя твоя молитвы, изведе тя из темницы и заточения, преблаженне отче наш Гликерие, на пользу Церкви Своей, яко искушена во всех страданиих, великим подобающих исповедником Истины; сего ради и мы восхваляем тя сице:
Радуйся, яко за Истину в темницу ввержен был еси;
радуйся, яко и тамо, аки в монастыре, всею душею Богу молился еси.
Радуйся, ако Христос молитву твою прият и веру твою не посрами;
радуйся, яко волею Его из темницы свобожден был еси.
Радуйся, яко вся верныя в Вере утвердил еси;
радуйся, яко вся храмы разоренныя паки воздвигл еси.
Радуйся, яко за вся Христа Бога благодарил еси;
радуйся, яко мзду велию за ревность твою о Православии от Бога восприял еси.
Радуйся, яко венцем славы небесныя от Христа увенчан был еси;
радуйся, яко исповедником древным уподобился еси.
Радуйся, яко купно с ними в селения праведных водворился еси.
Радуйся, преблаженне святителю Гликерие, Православия исповедниче!

КОНДАК 8.

Защититель обидимым был еси и твердый сопротивоборник новостильником, иже красныя уставы и предания святых отец превратиша, святителю Гликерие, путеводя стадо твое блистаньми подвигов твоих досточудных, в пустыни непроходней страстей, к земли обетования небеснаго, ко Христу, емуже вкупе с тобою поем: аллилуия!

ИКОС 8.

Возлюбившии лжу и нововведения папская назираху на тя, ищуще вины, яко да уловят тя паки и изженут из среды стада твоего. Обаче, яко пастыр добрый, стал еси посреде овец твоих даже до смерти, и положил еси душу твою за агнцы Христовы, святе Гликерие! Сего ради и мы смиреннии приносим ти хваление сицевое:
Радуйся, истинне архипастырю Церкве Христовы;
радуйся, вся бо верныя вельми полезнствовал еси.
Радуйся, яко в напастех адамант тверд явил еси себе;
радуйся, яко лукавство папистов обнажил еси.
Радуйся, яко ими жестоко измучен был еси;
радуйся, яко злобу их нивочтоже вменил еси.
Радуйся, яко по биений и всевидных страданий светлейший явился еси;
радуйся, яко во граде Пиатра Нямц до смерти биен был еси.
Радуйся, яко замучен быв, в темницу в Букурещи ввержен бысть;
радуйся, яко жена управителя внутренных дел пищу и воду ношаше ти.
Радуйся, яко Веры праотеческия ради вся претерпел еси;
радуйся, яко крепцыи мира сего гонение на тя подъяша.
Радуйся, преблаженне святителю Гликерие, Православия исповедниче!

КОНДАК 9.

Многим попечением бдел еси над паствою духовною твоею в годину бурну, преблаженне святителю Гликерие, и вся вжилял еси мужеством чада твоя, да не уклонятся от пути Правыя Веры, но да поют Христу хвалу: аллилуия!

ИКОС 9.

Яко рождие возращенное из корене рода Ромынскаго, преблаженне Гликерие, веры ради твоея и яко соблюдаше чадца твоя в Вере Правей, ввержен был еси в темницу, множицею биен быв, и венец неувядаемый исповедника сподобился еси от Христа прияти; тем и мы любовию зовем ти сице:
Радуйся, святителю Гликерие, яко Истине послужил еси;
радуйся, яко народа ради и Веры Правыя много пострадал еси.
Радуйся, яко за предания святых отец много потрудился еси;
радуйся, мужески сопротивники победивый.
Радуйся, в вихре страстей искусный борец показавыйся;
радуйся, яко лжебратии премудростию одолел еси.
Радуйся, яко от начальников Святыя Горы благословение приял еси;
радуйся, яко и патриарх Иерусалима града тя утверди.
Радуйся, яко верныя люди твоя страхом Божиим созидал еси;
радуйся, яко роду Ромынскому столп несокрушим явился еси.
Радуйся, преблаженне святителю Гликерие, Православия исповедниче!

КОНДАК 10.

Дивная твоя исправления, святителю Гликерие, не долготою дний соизмеряти лепо есть, но сердцем твоим горящим о Вере истинней. Обаче надолзе паствуя стадо Христово, креплий сердцем бысть, темже и сподобился еси вкупе со святыми пети Богу на небеси: аллилуия!

ИКОС 10.

Стена необорима явился еси пред лицем враг Веры праотеческия, святителю Гликерие, яко всеобразными муками тщашася преломити веру твою да бы лжу их исповедал. Обаче столп огненный пребыл еси ближняя и дальняя озаряя сиянием подвига твоего; сего ради благоговением тя хвалим и поем тебе сице:
Радуйся, яко от воинов избиен был еси приклады оружий их;
радуйся, яко чизмами своими попраша и сомлеша тя.
Радуйся, яко сквозе ограждение железных терний проведоша тя;
радуйся, яко до смерти следы язв на теле своем носил еси.
Радуйся, яко во страданиих твоих Христу благоугодил еси;
радуйся, яко кровию твоею землю Ромынскую напоил еси.
Радуйся, яко Истину Христову жизнию твоею запечатлел еси;
радуйся, яко в Вере Правей непозыблем до конца пребыл еси.
Радуйся, яко страдания нестерпимая добле претерпел еси;
радуйся, яко образ мученик святых на ся носил еси.
Радуйся, яко страна Молдовская приношение Богу даде тя;
радуйся, Церкве праотеческия столпе непревратимый.
Радуйся, преблаженне святителю Гликерие, Православия исповедниче!

КОНДАК 11.

Множицею яша тя, на лета тяжкая в темнице осуждаху тя, и на смерть осужден был еси, отче наш Гликерие; но в терпении твоем уподобился еси многострадальным исповедником Истины, пребыв непоколеблемь в Вере и Богу хвалы принося благоговейно: аллилуия!

ИКОС 11.

Шестдесят лет Церковь Христову пасл еси — священник, архипастырь и первосвятител, — пекийся о стаде духовнем с великим усердием; сего ради по достоянию тя хвалим и глаголем:
Радуйся, неутомимый пастырю словеснаго стада Христова;
радуйся, яко предания святых отец с мученическою ревностию хранил еси.
Радуйся, яко чад твоих в муках не оставил еси сирых;
радуйся, яко Вере истинней вся научил еси.
Радуйся, усердно образу жития святых последовавый;
радуйся, яко храмы разоренныя возставил еси.
Радуйся, яко обитель Слатиоарскую основал еси;
радуйся, яко и иныя монастыри духовным жительством украсил еси.
Радуйся, глубокому смирению священники твоя учивый;
радуйся, великим преподобным яко воистину подражавый.
Радуйся, яко и на Святей Горе многия полезнствовал еси;
радуйся, яко и Гробу Господню с ревностию поклонился еси.
Радуйся, преблаженне святителю Гликерие, Православия исповедниче!

КОНДАК 12.

Разориша невернии паполюбцы вся святыя храмы тобою согражденныя, обаче верою паки возсоздал еси я и достойно в них служил еси; ныне же на небесех сущу ти и бдящу над церковию твоею, краснейшыя храмы наследницы твои воздвигоша, во славу вселенскаго Православия. Темже верою поем вси Бога, вся добре устрояющаго: аллилуия!

ИКОС 12.

Бури належащей на Церковь Божию, Бог тя избра, святителю Гликерие, яко корабль спасительный роду Ромынскому, в сохранение Веры Правыя. По отшествии же твоем на небо Бог дарова нам святыя мощи твоя, яко сокровище многоценное, покоющееся во обители Слатиоарстей; сего ради зовем ти сице:
Радуйся, небоязненный защитниче стада Христова;
радуйся, пастырь преподобен чадом твоим явивыйся.
Радуйся, службу тебе посвященную почтивый;
радуйся, от святаго Православия неуклонивыйся.
Радуйся, яко прежде успения твоего Ангели святую Литургию служаху ти;
радуйся, яко ныне со святыми на небесех утешаешися.
Радуйся, яко добрую Веру до конца соблюде;
радуйся, яко купно со Апостолы подвигом добрым подвизася.
Радуйся, яко венец победы и правды от Христа приял еси;
радуйся, яко правило жития высока всем оставил еси.
Радуйся, исповедниче пламенный Веры праотеческия;
радуйся, яко и ныне от небес о нас печешися.
Радуйся, преблаженне святителю Гликерие, Православия исповедниче!

КОНДАК 13.

О, преблаженне святителю Гликерие, иже достойно Христу послужил еси и страданьми и болезньми твоими в житии сем сподобился еси деснаго стояния у Отца Небеснаго: приими ныне смиренныя моления наша, умоляй благаго Бога даровати Церкви своей крепость, стране же нашей мир, во всех благопоспешение, нам верующым оставление грехов и велию милость, яко да поем вкупе с тобою Богу: аллилуия!

(Този кондак се казва три пъти. След това се чете отново Икос 1. и Кондак 1.)


МОЛИТВА КО СВЯТИТЕЛЮ ГЛИКЕРИЮ:

Святителю отче Гликерие, иже воистину многим смирением пожил еси в житии монашестем и даров небесных прияти сподобился еси, Веру Православную превыше всех временных держал еси, и претерпел еси болезни и осуждение на смерть защищения ради праотеческия Веры сея и народа православнаго, егоже укрепил еси и Истине святей учил еси. Должни есмы всяко почитати тя, яко в земли Молдовстей возращен быв, Веру святую Православную тамо возрастил еси, ныне же радуешися во славе мученик и исповедник Христовых. Приими убо молитву нашу и ходатай нам буди к Преблагому и Премилостивому Богу в Троице славимому. Покрый вся чтущия тя молитвами твоими, яко столп непозыблем Веры Правыя.

Молися Богу да утвердятся единение и любовь между братии, да излиется на сердца всех верных благодать Божия, да соблюдется стадо благоверное от всякаго злаго обстояния, яко да единеми усты и единым сердцем прославим Подателя всех благ и Спаса нашего. Буди бдяй над нами и молися за ны, да, избавлени бывше молитвами твоими от всех сетей лукаваго, подвиг добрый спасения совершаем во вся дни живота нашего, пребывающе непоколеблемы в Вере Правей отцев и праотцев наших.

Молися Богу да ниспослет скорую Свою помощь всем правоверным, прибегающым к ходатайству твоему и помощи твоей, да благопослушлив будет всем молением яже ко спасению в нынешней и в вечней жизни. Подаждь нам благодать от святых мощей твоих, яко да вси верою покланяющиися тебе приимут заступление твое, во всех нуждах и прошениих наших, обретающе яже на пользу нам, яко да прославим Преблагаго Бога, в Троице покланяемаго Отца, и Сына, и Святаго Духа, амин.

Превод от румънски език, Елена Узунова.
Print Friendly, PDF & Email

Nicefor.Info